Vawiin Mim kut thla ni 1, 2023 (Zirtawpni) hian ICFAI UNIVERSITY, MIZORAM chuan NJ Yasaswy Memorial Auditorium-ah Fresher social hlimawm tak an hmang a. Hon’ble Chief Minister Pu Zoramthanga, Gov.t of Mizoram chu Chief Guest niin a hmanpui.
Item hrang hrang – zai leh lam hmuhnawm tak tak a awm a, pawn lam aṭanga Mizo zaithiam tak tak sawm an nih bakah Fresher King & Queen thlanna an nei nghal bawk a ni.
Chief Guest Pu Zoramthanga chuan, ICFAI University chu Mizoram tana a pawimawhzia a sawi a; khawvel changkang tawh takah mahni kawtkai mai aṭanga zirna sang tak an ban phaka a awm chu an vanneihzia sawiin, Chief Minister chuan, Pathianin mihringte hi talent ropui tak neiin min siam a, chu talent chu up bet mai lova thil ropui tak tihna atana hmang chhuak turin zirlaite chu a fuih bawk. Mizoram mipuite vanneihzia sawiin, Pathianin khawvela ram ralmuang ni turin a hum tlat thu a sawi a. Fresher zawng zawngten an theihna leh thiamna te ram tana hlan ve turin a sawm bawk a ni.
He hunah hian ICFAI University Registrar Dr. David Lawmzuala pawhin welcome speech sawiin, report ngaihnawm tak a pe a; UG leh PG zirlaite chu an zirnaah theihtawp chhuah turin leh hun harsaah pawh zirna bansan mai lova ram tan leh Pathian tana ṭang fan fan turin a fuih a. Chu bakah Chief Minister-in University tana pa chan a lo chan tawh ṭhinnaah lawmthu a sawi bawk a. Tin, thu a sawi zawhin Registrar chuan Chief Guest chu chawimawina thuziak citation a hlan bawk. Dr. Lalthanpuii Sailo, Academic Co-ordinator-in Mizo kut chhuak thilsiam chi hrang hrang a hlan nghal bawk.
ICFAI UNIVERSITY-ah hian tun dinhmunah zirlai 630 an awm a. Department 12 a awm a, chung zinga 5 te chuan Under graduate course a chhawp chhuah niin, department 10-ah post graduate course chhawp chhuah a ni bawk. Faculty 58 awmin, zirna piahah seminar leh activity hrang hrang buatsaih a ni ṭhin a; tin, kum 2024 aṭangin PhD programme hawn tum a ni bawk.
